Barcelona ta samu ribar sama da dala biliyan 1

Barcelona ta kafa tarihin zama kungiya ta farko a

kakar wasannin da ta gabata, da ta bayyana

samun ribar da ta zarta dala biliyan guda.

Tun a ranar Talata da ta gabata Barcelona ta

kammala tantance ribar da ta samu a kakar wasa

ta 2017/2018 da yawanta ya kai dala biliyan da

miliyan biyar.

Karo na biyar kenan Barcelona na samun

hauhauwar riba dangane da kudaden shigar da take

samu a karshen kowace kakar wasa.

Barcelona ta ce karin ribar da ta samu na wannan

lokacin, ya dogara ne akan yarjejeniyoyin haska

wasanninta na gasar zakarun turai a kafafen

talabijin, da ta kulla da hukumar UEFA, sai kuma

cinikin sayarda dan wasanta Neymar ga Paris St

Germain akan euro miliyan 222, cikin watan

Agustan 2017.

A kakar wasa ta bana kuwa kungiyar Barcelona

ta bayyana kasafin dala biliyan 1 da miliyan 105

domin gudanar da harkokinta. Kungiyar ta kara

da cewa zuwa ranar 30 ga watan Yuni, ana binta

bashin dala miliyan 181 da dubu 300.